翟文鳳

翟文鳳係香港首位「刀片跑手」，係香港第一位截肢者使用刀片跑步，佢同時亦都係香港截肢者協會嘅會長同埋創辦人。

佢患有先天性嚴重血管腫瘤，腫瘤分布喺全身唔同嘅位置。由於呢個病喺當時係無藥可醫，加上截肢嘅風險好大，所以佢未有接受截肢嘅方案，而醫生亦預計佢唔可以活過20歲。

後來，佢遇上養和醫院嘅醫生，醫療進步下，醫生決定幫佢截肢，並幫佢裝上義肢。一開始連企都企唔到，慢慢鍛鍊下，佢可以行路，最後更加參加渣打馬拉松10公里賽事。喺比賽前，喺殘肢同義肢接觸之間嘅皮膚起咗水泡，令到佢對腳非常疼痛，但佢最後都堅持完成賽事。

喺整個過程之中，翟文鳳呈現出無比嘅毅力。使用義肢原本已經唔係一件容易嘅事，因為身體需要長時間同義肢進行協調。當身邊嘅人見到佢腳痛，勸佢唔好比賽，佢都選擇繼續賽事，嘗試盡力完成，未到最後一刻，佢都唔想放棄。